ဖိုးမထိုက်တဲ့ ထုတ်ကုန်များ

လမ်းတိုင်းကို လျှောက်တတ်ဖို့ဆိုတာ
အရည်အချင်းဟာ ရှိရတယ်
အရည်အချင်းရှိပြီး အတ္တကြီးရင်
နယ်ပယ်တခုမှာပဲ လသာနိုင်မယ်...။

နွားခြေရာကွက်လား
မူးလား
ဝါလုံးခေါင်းလား
ကွဲကွဲပြားပြား သိဖို့လိုတယ်
ဒီထက်ပိုပြီး
ငါမဟုတ်တဲ့ ငါများအတွက်
သင့်ရဲ့ အရောင်ဟာ
တောက်ပဖို့လိုတယ်
မဟုတ်ရင် ထင်တလုံးနဲ့ပဲ
ငါစွဲတွေနဲ့ ပိုးဖလံဖြစ်သွားနိုင်တယ်...။

တခဏမှာ
မျိုးစားငါးရာထုတ်နိုင်တဲ့ လုပ်ငန်း
သင့်ရဲ့ ပင်ပန်းခံမှုကို
ချီးကြူးလိုပါတယ်။
ဒါပေမဲ့...
ငါးနှစ်မှာ တမျိုးထုတ်တဲ့
ကုန်မျိုးလောက်တော့
သုံးခံနိုင်မှာ မဟုတ်ပါဘူး...။

ဘယ်အတတ်ပညာမဆို
ကိုယ့်တွက်လား၊ သူ့တွက်လား
တန်ဘိုးထားမှုက
ဈေးနှုန်းနဲ့သတ်မှတ် လိမ့်မယ်။
ဘယ်အသိပညာမဆို
ကိုယ်ကျိုးတွက်လား၊ များကျိုးတွက်လား
သင့်ရဲ့ ခံယူချက်က
မျှတတဲ့ ဈေးနှုန်းနဲ့ သတ်မှတ်လိမ့်မယ်
တန်ဘိုးဆိုတာ
သုံးစွဲသူတို့က သတ်မှတ်တာဖြစ်တယ်...။